TeTo
20-03-2006, 01:28 PM
أبو جهل وإبليس ........ بقلم الكاتب/ محمد عبد السلام
----------------------------------------
السلام عليكم
كان نفسى اول مشاركه منى فى عرباوى متكنش منقوله بس مكنش ممكن بعد مقريت الموضوع ده ماشركهوش مع كل العرباويه.
إبليس نايم بيشخر .. أبو جهل صحي من النوم .. يمد ايده بتكاسل على ريموت التليفزيون يقلب القنوات .. فجأة يلاقي خبر على قناة فضائية في منتهى الخطورة والمذيع بيتكلم وعلى وجهه انزعاج شديد
المذيع – ومن المنتظر ان لقاء النهارده تسيطر عليه روح قتالية شديدة في محاولة لإنقاذ الموقف ورد الصاع صاعين للفريق المنافس .. معنا من القاهرة مراسلنا فلان الفلاني .. أخي فلان .. كيف ترى الوضع والتطورات الأخيرة الآن
المراسل - الوضع الآن خطير جدا .. والخطة الدفاعية الجديدة لم تفلح في إنقاذ الفريق .. مما أدى إلى استعمال خطة بديلة تمثلت في هجوم كاسح على خطوط الخصم .. الجميع هنا في حالة من الحماس غير عادية ولأول مرة منذ سنوات طويلة نشهد هذا التجمع لجماهيري في استاد القاهرة في محاولة يائسة لإنقاذ الفريق من هزيمة محققة
المذيع – أخي فلان .. هل الوضع مطمئن أم يبعث على القلق ؟؟
المراسل – الحالة خطيرة .. والوضع مقلق ولو استمر الحال على ماهو عليه يمكن أن يتسبب في خسارة فادحة
أبو جهل يصاب بهلع شديد من الكلام اللي بيسمعه .. القاهرة في خطر .. يا نهار اسود .. بص من الشباك .. عشرات السيارات تحمل الأعلام وهتافات تشق عنان السماء .. بطنه كركبت . جري عالحمام .. طلع جري على التليفزيون .. الآف متجمعين بيهتفوا في حماس شديد .. ايه ده ؟؟ كل دول ؟؟ .. جري يصحي ابليس
ابوجهل – ابليس .. ابليس .. اصحى اصحى .. مصيبة .. كارثة
ابليس يقوم مفزوع من النوم – ياساتر يارب .. فيه ايه .. حصل ايه ؟؟
ابو جهل – حرب .. حرب هنا في القاهرة .. الأخبار خطيرة جدا . وبيقولوا فيه خسارة فادحة
ابليس – يانهار اسود .. افتح التليفزيون افتح .. خليني اشوف
يفتح على نفس القناة .. قناة ( صباح الفل ) الرياضية
المراسل اياه – ومازال زحف الفريق مستمرا .. فيما يستميت الدفاع المنافس في محاولة يائسة للإفلات من الهزيمة
ابليس – هههههههههه .. يا عبيط .. ده اللي مخوفك ؟؟ هههههههههه
ابو جهل – بتضحك على ايه .. مش سامع بيقول ايه ؟؟
ابليس – اصبر شوية وانا اشرح لك
ابو جهل – رايح فين ؟؟
ابليس – هاخش آخد دش واجيلك
ابو جهل – مش تقوللي ايه الحكاية ؟؟
ابليس – اما اطلع هافهمك
يقوم ابليس ويسيبه
ابو جهل مستمر في الفرجة على التليفزيون في محاولة لفهم الوضع .. فجأة تنتقل الكاميرا لمكان واسع .. أكيد كلنا عارفينه طبعا .. والمعلق بيعلق على المباراة .. وبدأ أبو جهل يفهم طبيعة المعركة الدائرة على أرض الملعب
إبليس يرجع
ابليس – هاا .. بيتهيألي فهمت
ابو جهل – آه .. ده الماتش اللي كنت قلت لي عليه أول ماجيت ؟؟
ابليس – عليك نور .. طول عمرك نبيه
ابو جهل – يعني ما ينفعش يلعبوا كورة من غير الإرهاب اللي عاملينه في التليفزيون ده ؟؟ ما يلعبوا وخلاص يا أخي .. لازم الوهم ده ؟؟ ده انا دمي نشف
ابليس – هههههه .. صحيح الرياضة حلوة .. بس دلوقت بقى الموضوع أكبر من الرياضة بكتير .. وبقى مصالح شخصية وبيزنس وحوارات جامدة أوي
فجأة التتر يتحرك على شاشة التليفزيون .. ( حان الآن موعد أذان العشاء )
أبو جهل – ايه الغلاسة دي ؟؟ .. هو ده وقت صلاة ؟؟ .. عايزين نكمل الماتش
ابليس – لا يا راجل صلاة إيه بس ؟؟ .. دي آخرها الإعلان اللي انت شفته بس
ابو جهل – يعني الناس دول مش هيقوموا يصلوا ؟؟
ابليس – لا ياراجل .. ما هم قاعدين اهم ما حدش بيتحرك
ابو جهل – ومسلمين برضه ؟؟
ابليس – طبعا .. انت مش شفت الإعلان بتاع الأذان
ابو جهل – أصل الصلاة دي كانت مشكلة كبيرة أوي مع محمد وأصحابه .. ما يسيبوهاش أبدا .. حتى فاكر لما انت مرة وزّيتني وخليتني رميت عليه أمعاء الجمل وهو بيصلى .. ما قطعش الصلاة برضه
إبليس – ده كان زمان يا بو الحكم .. دلوقت خلاص .. الناس ممكن تضيع الصلاة عادي .. يصلوها متأخر .. عادي
إبليس – يلا قوم البس عشان عندنا عزومة على فرح كده
أبو جهل – فرح ؟؟ .. بلاش انا .. أنا أكتر حاجة تضايقني أشوف المسلمين فرحانين
إبليس – معلش .. مجاملات بقى يابو الحكم .. والناس عازميني وعشمانين فيا أوي
أبو جهل – أمري لله .. حتى أشوف أفراح المسلمين شكلها إيه
ينزلوا . يوصلوا عند مكان كده زحمة أوي .. بيوتي سنتر شيك أوي .. الناس واقفين بالعربيات بره .. والكل في الانتظار
أبو جهل – مستنيين إيه دول ؟؟
أبليس – دي العروسة جوه .. بتتزين ويسرحوا شعرها وحاجات كده لزوم الفرح
أبو جهل يبص .. لوحة كبيرة على الباب .. ممنوع دخول الرجال
أبو جهل – أكيد طبعا مادام مسلمين .. ما ينفعش الرجالة يخشوا جوه
إبليس – تعالى أعرفك على العريس
يروحوا يسلموا على العريس ..يباركوا له .. ويرحب بيهم بشدة
أبو جهل يضحك مع العريس – ما تدخل جوه ياعريس .. مش عروستك دي ؟؟ .. خش ياراجل .. هتسيبها وتقف معانا ؟؟
العريس – لا ما ينفعش .. ممنوع دخول الرجال .. مش مشكلة .. نستنى شوية
شوية كده وواحد يوصل .. علامات ارتياح على وجوه الجميع
العريس – الحمد لله .. أهو احمد وصل .. كنت خايف أوي ما يجيش
أبو جهل – اسمه احمد ؟؟ .. مين ده ؟؟
إبليس – ده الكوافير .. اللي هيظبط العروسة ويعمل لها شعرها
يدخل أحمد إلى الداخل .. وسط ترحيب الجميع .. أبو جهل مستغرب جدا
أبو جهل – ايه ده .. ده راجل اللي دخل جوه ده ؟
العريس – أيوه طبعا .. ده احمد يا أخي ؟؟ ما تعرفوش ؟؟
أبو جهل – أحمد يعني إيه ولا مؤاخذة .. إيه اللي دخله جوه مع الستات ؟؟
العريس ( يضحك بشدة ) – ههههههه .. والله يا إبليس بيه صاحبك ده ظريف أوي .. يا أستاذ عمرو ده الكوافير .. الكوافير .. يخش ويطلع عادي .. الناس كلها عارفة الحكاية دي
أبو جهل – لا بصراحة أنا أول مرة اعرف .. بس اشمعنى ده بالذات اللي انبسطت أوي انه جه ؟؟
العريس – أصل العروسة كانت طالباه بالاسم .. وبتستريح تحت إيده جدا .. تطلع من تحت إيده ملكة جمال .. سبحان الله .. معلم بصحيح
العريس يفتح الباب فتحة صغيرة كده .. ينادي على أحمد بيه
العريس – الله ينور يا بو حميد .. مش هاوصيك بقى .. ومش مستعجلين .. خد راحتك خالص
احمد – ما تقلقش يا عريس .. أنا عينيا عشانك .. ده هي العروسة زي القمر من غير حاجة
العريس – ده من ذوقك والله يا احمد بيه .. ميرسي أوي
في الداخل .. الاسطى احمد يهزر مع العروسة .. معرفة قديمة بقى
الاسطى احمد – العريس بره هيولّع .. هههههه .. له حق .. الفستان عليكي هياكل حتة منك
العروسة ( بدلال ) – هئ هئ هئ .. ميرسي أوي يا احمد
الاسطى احمد - .. تحبي احرق لك دمه .. نتأخر عليه شوية .. هههههههه
العروسة – حرام عليك يا احمد .. هئ هئ هئ .. ده انت مشكلة والله
أبو جهل لإبليس – هوه فيه ايه يا بني ؟؟ .. الله يخرب بيتك .. دي العملية بايظة خالص
إبليس – إيه رأيك بقى .. لما نرجع تبقى تحكي لهم في دار الندوة على شغل اخوك
أبوجهل – أحكي لهم .. أحكي لهم ايه ياعم ؟؟ .. أكيد مش هيصدقوني
أحمد ينهي المهمة بنجاح تام .. والعريس يطلع مبلغ كده من جيبه ويديهوله بقشيش .. وسط عبارات الشكر والامتنانتنتهي مراسم تجميل العروسة .. يطلعوا على المصوراتي .. نكمل وللا بلاش احسن .. نكمل .
عشرات السيارات في الانتظار .. عرايس وعرسان داخلين طالعين . وصور مغطية محل التصوير من بره .. صور رجال ونساء في أوضاع مريبة خلت الفار يلعب في عب أبو جهل
أبوجهل – إبليس .. إيه اللي بيحصل هنا ؟؟ .. الناس دول بيخشوا جوه يعملوا إيه ؟؟.. وإيه الصور دي ؟
إبليس – دي من طقوس الزواج الضرورية دلوقت .. كل واحد يتصور مع عروسته قبل ما يروحوا الفرح .. وممكن يتصور مع بعض المعازيم كمان .. تحب تدخل جوه
أبو جهل – أدخل ؟؟ طبعا أدخل .. خلينا يا عم نتفرج
يدخلوا جوه .. في الاستوديو .. العريس يرحب بيهم
العريس – اتفضل يا إبليس بيه .. اتفضل . انت مش غريب
المصوراتي مشغول بضبط وضع العروسة مع العريس عشان الصورة .. ما سكها من كتفها .. ويحركها يمين وشمال .. يجيب وشها يمين .. يعدل راسها لفوق
المصوراتي – أيوه كده .. ميلي على كتفه كده .. كمان .. كمان .. أيوه عايزك على صدره كده .. ( يكلم العريس ) – بص بقى .. إيدك من هنا كده .. أيوه بالظبط كده . يابني مش كده .. إنت أول مرة تتجوز وللا إيه .. ههههههههه .. يضحك الجميع ..
المصوراتي يمسك العروسة - بص .. كده .. كده .. عايزك تمسكها كده بالضبط
العريس يتضايق من الحركة .. بس يبلعها عشان لازم يبقى جنتل قدام الناس .. يضحك وكإن مش هامّه حاجة
العريس – ههههههه .. آه والله فعلا أول مرة اتجوز .. هههههههههه
المصوراتي - بصى له بقى بصة حلوة كده .. ابتسمي .. الله .. أيوه .. حلوة أوي الابتسامة دي .. ياللا يا جماعة هنصور .. شييييييييييييييييز
أبو جهل (يشاور على المصوراتي ) – إبليس .. باقولك إيه .. هوه الجدع ده كوافير برضه؟
إبليس – لأ .. ليه ؟؟
أبو جهل – شايفه عمال يمسك العروسة كده يعني زي ما يكون ولامؤاخذة كوافير
إبليس – لا يا أخي .. عادي عادي .. هوه نظام الأفراح كده دلوقت
أبو جهل ( بنفاذ صبر ) – طيب .. ما تخلصنا من الشغلانة دي .. هوه فين الفرح ؟؟
إبليس – يخلصوا بس التصوير .. ونطلع على الفرح على طول
انتهى التصوير .. وانطلق الموكب الشديد في طريقه إلى الفرح .. الكل فرحان ويطلق كلاكسات العربيات في فرحة وبهجة
يوصلوا القاعة .. حاجة فخمة أوي .. والفرقة في الاستقبال ويمشي العريس والعروسة إلى داخل القاعة ومن وراهم المعازيم .. وفي داخل القاعة تبدأ مراسم الفرح بترديد أسماء الله الحسني
أبو جهل يشوف المنظر .. الكل بيردد أسماء الله الحسنى في خشوع .. الفرح فيه عدد كبير من الستات والبنات المحجبات .. يشعر بقلق .. يبص لإبليس .. إبليس بيبتسم في هدوءأبو جهل ( في انزعاج شديد ) – إيه ده يا إبليس .. أهو ده اللي كنت خايف منه وعامل حسابه . طلعني من هنا .. مش قادر اسمع الكلام ده
إبليس ( بثقة زائدة ) – ولايهمك .. استني دقيقتين بس
إبو جهل – يارجل أنا مش مستحمل المنظر .. الكل بيردد الكلام ده اللي انا مش باحب اسمعه . بص الناس متسمرين ازاي وهم بيسمعوا الكلام ده .. مش قادر . مش قادر
إبليس يمسك فيه شوية .. شوية والمقدمة تنتهي .. وينطلق الدي جي ليرفع عقيرته بصيحات الحرب في حماسة شديدة وعظمة أشد
الدي جي – والنهارده هنعيش أجمل الأوقات مع الأوركسترا العالمية .. بطاطا
أبو جهل – إيه ده يا إبليس .. طلع منين الواد ده .. وإيه اللي بيقوله ده
إبليس – ده الدي جي .. هو كبير القعدة دي .. يظبط الفرقة والناس .. بص كده
فجأة الأرض اهتزت تحت أقدام أبو جهل .. بفعل عدد رهيب من الآلات الموسيقية وعدد مخيف من الساوندات سببت له صمم مؤقت . وبص حواليه لقى الرجال المتسمرين .. والستات المتسمرات .. والمحجبات والمتبرجات كلهم قايمين يهنوا العريس والعروسة .. وسط ألحان صاخبة .. والـ دي جي واقف يطلق صيحات عالية ويشير للجميع بعظمة شديدة
أبو جهل – والـ دي جي ده ماله شايف نفسه كده ؟؟ .. ده آخره ولا مؤاخذة صبي عالمة
إبليس – هههههههه .. الله يكسفك .. يابني خليك مودرن بقى وبطل الكلام ده
فجأة تغيرت الموسيقى إلى نغمات حالمة .. وفوجئ أبو جهل بالعريس والعروسة بينزلوا ويرقصوا سويا قدام الناس .. ويتحركوا مع الموسيقى حركات استغرب لها جدا .. وسط تصفيق الجميع تتحرك أم العروسة وتغطي راس العريس مع راس العروسة بطرحة العروسة ..
أبو جهل – إبليس .. إبليس .. هم هيعملوا إيه ؟؟ .. منظرهم كده ما يطمنش
إبليس – ياراجل انت دايما تفكيرك وحش كده ؟؟ .. ده بيرقصوا مع بعض يا أخي بمنتهى الاحترام والأدب أهه
أبو جهل – آآآآه .. بيرقصوا .. ياراجل طمنتني .. أنا قلت مش معقول برضه
ينتهي العريس والعروسة من رقصتهم .. ويقعدوا في الكوشة .. يفاجأ أبو جهل ببنتين بيطلعوا على البست ويتحزموا ويرقصوا عشرة بلدي قدام العريس والعروسة .. في اجتهاد شديد في إظهار مفاتنهم .. مع إن واحدة منهم مغطية شعرها زي المحجبات
إبو جهل – إيه الغانيات دول ؟؟ الجواري ؟؟
أبليس – لا ياراجل .. جواري إيه بس .. دي أخت العروسة .. ودي واحدة صاحبتها .. بيرقصوا تحية للعرسان .. ولأسباب تانية برضه
أبو جهل – زي إيه كده ؟؟
إبليس – أهو كل واحدة منهم بتحاول تلفت نظر الشباب الموجودين .. يمكن تلاقي لها جوازة .. ده بقى نظام معتمد عند ناس كتير عشان يتجوزوا .. تعالى بقى نقعد في وسط الناس عشان عندي شوية شغل
يقعد إبليس مع شلة من الشباب أصحاب العريس .. يوسوس لهم شوية .. فتبدأ عينيهم تزوغ على البنات اللي بيرقصوا
واحد – بص ياله البنت دي .. أيووووووووه .. إيه اللي عاملاه في نفسها ده .. يخرب بيتها . دي رقصها عشرة على عشرة
التاني – لالأ .. بص صاحبتها دي .. دي أفرس منها .. جامدة أوي بصراحة .. ما تيجي نشوفوا نظامهم إيه دول .. ههههههههه
التالت – استنوا استنوا اصورهم بالموبيل ..
يطلع الموبيل .. كليك .. كليك .. كام صورة حلوين .. الله ينور .. يتحركوا في اتجاه البنات يصقفوا لهم جامد .. البنات يتحمسوا أكتر مع التصفيق .. إبليس يفرح جدا .. وينتقل لمجموعة تانية وتالتة .. ويمارس هوايته في الغواية والإفساد ..
أبو جهل مبسوط جدا من اللي بيشوفه .. وإبليس شاعر بالفخر قدامه
أبو جهل – والله جميلة أوي أفراح المسلمين دي .. أهو كده الواحد يشم نفسه شوية
إبليس – أنا قلت افرفشك شوية .. تعال نروح بقى .. أنا كده خلصت شغلي
يخرج إبليس وصديقه اللدود أبو جهل .. بيضحكوا بشدة على اللي عمله إبليس في المسلمين .. إبليس نافش ريشه قدام أبو جهل .. وأبو جهل فرحان أوي بسلوكيات المسلمين المنحرفة
يركبوا العربية متوجهين للفندق .. الشوارع فاضية .. الساعة تلاثة الفجر .. وإبليس بيجري بالعربية .. فجأة يظهر قدامه واحد بيعدي الشارع .. إبليس يضغط على الفرامل بأقصى قوة .. يحاول يفاديه .. يمين .. شمال .. اصطدم بيه بشدة .. والعربية انحرفت منه وخبطت في عامود نور
صمت رهيب يخيم على المكان .. أبو جهل مذهول من الموقف .. إبليس يحاول يخرج من العربية .. يطلع بصعوبة شديدة .. اتخبط في دراعه خبطة جامدة .. لكن بيتحرك برضه .. أبو جهل ما حصلوش حاجة .. ينزل من العربية .. يتوجهوا ناحية المصاب .. بعض السيارات وقفت على جنب .. واتنين تلاتة اتجمعوا .. واحد ينزل من العربية ويتجه ناحية المصاب
الراجل – إصابته شديدة يا جماعة .. لازم يروح المستشفى حالا
إبليس – أنا حاولت أفاديه أد ما اقدر .. بس مافيش فايدة
الواحد – مش وقته الكلام ده .. لو عربيتكم مش هينفع تتحرك آخدكم معايا .. لازم نروح المستشفى حالا
أبو جهل – طيب .. نروح
ضابط مرور يوصل بالموتوسيكل .. يفهم الموضوع .. ينطلقوا كلهم للمستشفى
في الطريق .. الراجل يعرفهم بنفسه .. الدكتور محمود .. طبيب في أحد المستشفيات الخاصة .. يتصل من الطريق بالمستشفى .. عشان يجهزوا غرفة العمليات
في المستشفى .. المصاب نزف دم كتير .. ولازم نقل دم فورا .. وهيعمل عملية سريعة .. أخدوا عينة دمه .. فصيلة دمه مش موجودة في المستشفى
الدكتور محمود – حد من قرايبك ممكن يتبرع لك بالدم ؟
المصاب – أنا راجل غلبان يا دكتور .. وماليش حد .. وما عنديش تليفون اتصل بحد .. ارجوك انقذني يا دكتور
الدكتور محمود عينة دمه من نفس الفصيلة .. ياخد قرار سريع بالتبرع بدمه لإنقاذ حياة المصاب
أبو جهل – انت يا دكتور تعرف الراجل ده ؟
الدكتور – لا .. أنا أول مرة أشوفه
أبو جهل – وازاي تساعد واحد ما تعرفوش ؟؟
الدكتور – مش إنسان يا خي ؟؟ .. بني آدم زيي .. غريبة ان انا اساعده ؟؟
أبو جهل - أصلي شايفك بتساعده بإخلاص أوي .. وكمان هتتبرع له بدمك
الدكتور – يا حاج أنا راجل مسلم واعرف ربنا .. لو ما كنتش أنا أساعده بإخلاص في ظرف زي ده .. أمال مين اللي يساعده .. ربنا بيقول ( إنما المؤمنون إخوة )أبو جهل يشعر بحسرة شديدة .. وفي لحظات يتبرع الدكتور بدمه لإنقاذ المصاب .. ويدخله غرفة العمليات .. الجميع في انتظار انتهاء العملية
أبو جهل – هو انت متعود تعمل كده دايما ؟؟
الدكتور – ربنا يقدرنا دايما على فعل الخير .. الحقيقة أنا أول مرة اعمل كده .. بس شعور جميل جدا انك تنقذ حياة انسان .. فعل الخير جميل جدا
الدكتور يطلع مصحفه ويقرأ القرآن بصوت جميل .. ويدعو بحرارة للمصاب
أبو جهل يكاد يبكي من الحسرة .. إبليس يشعر بآلام شديدة من قراءة القرآن .. يتجه إلى دورة المياه فرارا من الموقف .. أبو جهل يشعر بالعيون تحيط بيه .. وهو وحيد ومنبوذ .. يسمع الدكتور محمود وهو يرتل القرآن .. صوته يرتفع شيئا فشيئا .. يملأ الغرفة بصوت جميل .........
هناك تكمله للقصه لكن انا مش هكتبها كلها ولكن هجيب الحلقه الاخيره وخلاص
:)
__________________
----------------------------------------
السلام عليكم
كان نفسى اول مشاركه منى فى عرباوى متكنش منقوله بس مكنش ممكن بعد مقريت الموضوع ده ماشركهوش مع كل العرباويه.
إبليس نايم بيشخر .. أبو جهل صحي من النوم .. يمد ايده بتكاسل على ريموت التليفزيون يقلب القنوات .. فجأة يلاقي خبر على قناة فضائية في منتهى الخطورة والمذيع بيتكلم وعلى وجهه انزعاج شديد
المذيع – ومن المنتظر ان لقاء النهارده تسيطر عليه روح قتالية شديدة في محاولة لإنقاذ الموقف ورد الصاع صاعين للفريق المنافس .. معنا من القاهرة مراسلنا فلان الفلاني .. أخي فلان .. كيف ترى الوضع والتطورات الأخيرة الآن
المراسل - الوضع الآن خطير جدا .. والخطة الدفاعية الجديدة لم تفلح في إنقاذ الفريق .. مما أدى إلى استعمال خطة بديلة تمثلت في هجوم كاسح على خطوط الخصم .. الجميع هنا في حالة من الحماس غير عادية ولأول مرة منذ سنوات طويلة نشهد هذا التجمع لجماهيري في استاد القاهرة في محاولة يائسة لإنقاذ الفريق من هزيمة محققة
المذيع – أخي فلان .. هل الوضع مطمئن أم يبعث على القلق ؟؟
المراسل – الحالة خطيرة .. والوضع مقلق ولو استمر الحال على ماهو عليه يمكن أن يتسبب في خسارة فادحة
أبو جهل يصاب بهلع شديد من الكلام اللي بيسمعه .. القاهرة في خطر .. يا نهار اسود .. بص من الشباك .. عشرات السيارات تحمل الأعلام وهتافات تشق عنان السماء .. بطنه كركبت . جري عالحمام .. طلع جري على التليفزيون .. الآف متجمعين بيهتفوا في حماس شديد .. ايه ده ؟؟ كل دول ؟؟ .. جري يصحي ابليس
ابوجهل – ابليس .. ابليس .. اصحى اصحى .. مصيبة .. كارثة
ابليس يقوم مفزوع من النوم – ياساتر يارب .. فيه ايه .. حصل ايه ؟؟
ابو جهل – حرب .. حرب هنا في القاهرة .. الأخبار خطيرة جدا . وبيقولوا فيه خسارة فادحة
ابليس – يانهار اسود .. افتح التليفزيون افتح .. خليني اشوف
يفتح على نفس القناة .. قناة ( صباح الفل ) الرياضية
المراسل اياه – ومازال زحف الفريق مستمرا .. فيما يستميت الدفاع المنافس في محاولة يائسة للإفلات من الهزيمة
ابليس – هههههههههه .. يا عبيط .. ده اللي مخوفك ؟؟ هههههههههه
ابو جهل – بتضحك على ايه .. مش سامع بيقول ايه ؟؟
ابليس – اصبر شوية وانا اشرح لك
ابو جهل – رايح فين ؟؟
ابليس – هاخش آخد دش واجيلك
ابو جهل – مش تقوللي ايه الحكاية ؟؟
ابليس – اما اطلع هافهمك
يقوم ابليس ويسيبه
ابو جهل مستمر في الفرجة على التليفزيون في محاولة لفهم الوضع .. فجأة تنتقل الكاميرا لمكان واسع .. أكيد كلنا عارفينه طبعا .. والمعلق بيعلق على المباراة .. وبدأ أبو جهل يفهم طبيعة المعركة الدائرة على أرض الملعب
إبليس يرجع
ابليس – هاا .. بيتهيألي فهمت
ابو جهل – آه .. ده الماتش اللي كنت قلت لي عليه أول ماجيت ؟؟
ابليس – عليك نور .. طول عمرك نبيه
ابو جهل – يعني ما ينفعش يلعبوا كورة من غير الإرهاب اللي عاملينه في التليفزيون ده ؟؟ ما يلعبوا وخلاص يا أخي .. لازم الوهم ده ؟؟ ده انا دمي نشف
ابليس – هههههه .. صحيح الرياضة حلوة .. بس دلوقت بقى الموضوع أكبر من الرياضة بكتير .. وبقى مصالح شخصية وبيزنس وحوارات جامدة أوي
فجأة التتر يتحرك على شاشة التليفزيون .. ( حان الآن موعد أذان العشاء )
أبو جهل – ايه الغلاسة دي ؟؟ .. هو ده وقت صلاة ؟؟ .. عايزين نكمل الماتش
ابليس – لا يا راجل صلاة إيه بس ؟؟ .. دي آخرها الإعلان اللي انت شفته بس
ابو جهل – يعني الناس دول مش هيقوموا يصلوا ؟؟
ابليس – لا ياراجل .. ما هم قاعدين اهم ما حدش بيتحرك
ابو جهل – ومسلمين برضه ؟؟
ابليس – طبعا .. انت مش شفت الإعلان بتاع الأذان
ابو جهل – أصل الصلاة دي كانت مشكلة كبيرة أوي مع محمد وأصحابه .. ما يسيبوهاش أبدا .. حتى فاكر لما انت مرة وزّيتني وخليتني رميت عليه أمعاء الجمل وهو بيصلى .. ما قطعش الصلاة برضه
إبليس – ده كان زمان يا بو الحكم .. دلوقت خلاص .. الناس ممكن تضيع الصلاة عادي .. يصلوها متأخر .. عادي
إبليس – يلا قوم البس عشان عندنا عزومة على فرح كده
أبو جهل – فرح ؟؟ .. بلاش انا .. أنا أكتر حاجة تضايقني أشوف المسلمين فرحانين
إبليس – معلش .. مجاملات بقى يابو الحكم .. والناس عازميني وعشمانين فيا أوي
أبو جهل – أمري لله .. حتى أشوف أفراح المسلمين شكلها إيه
ينزلوا . يوصلوا عند مكان كده زحمة أوي .. بيوتي سنتر شيك أوي .. الناس واقفين بالعربيات بره .. والكل في الانتظار
أبو جهل – مستنيين إيه دول ؟؟
أبليس – دي العروسة جوه .. بتتزين ويسرحوا شعرها وحاجات كده لزوم الفرح
أبو جهل يبص .. لوحة كبيرة على الباب .. ممنوع دخول الرجال
أبو جهل – أكيد طبعا مادام مسلمين .. ما ينفعش الرجالة يخشوا جوه
إبليس – تعالى أعرفك على العريس
يروحوا يسلموا على العريس ..يباركوا له .. ويرحب بيهم بشدة
أبو جهل يضحك مع العريس – ما تدخل جوه ياعريس .. مش عروستك دي ؟؟ .. خش ياراجل .. هتسيبها وتقف معانا ؟؟
العريس – لا ما ينفعش .. ممنوع دخول الرجال .. مش مشكلة .. نستنى شوية
شوية كده وواحد يوصل .. علامات ارتياح على وجوه الجميع
العريس – الحمد لله .. أهو احمد وصل .. كنت خايف أوي ما يجيش
أبو جهل – اسمه احمد ؟؟ .. مين ده ؟؟
إبليس – ده الكوافير .. اللي هيظبط العروسة ويعمل لها شعرها
يدخل أحمد إلى الداخل .. وسط ترحيب الجميع .. أبو جهل مستغرب جدا
أبو جهل – ايه ده .. ده راجل اللي دخل جوه ده ؟
العريس – أيوه طبعا .. ده احمد يا أخي ؟؟ ما تعرفوش ؟؟
أبو جهل – أحمد يعني إيه ولا مؤاخذة .. إيه اللي دخله جوه مع الستات ؟؟
العريس ( يضحك بشدة ) – ههههههه .. والله يا إبليس بيه صاحبك ده ظريف أوي .. يا أستاذ عمرو ده الكوافير .. الكوافير .. يخش ويطلع عادي .. الناس كلها عارفة الحكاية دي
أبو جهل – لا بصراحة أنا أول مرة اعرف .. بس اشمعنى ده بالذات اللي انبسطت أوي انه جه ؟؟
العريس – أصل العروسة كانت طالباه بالاسم .. وبتستريح تحت إيده جدا .. تطلع من تحت إيده ملكة جمال .. سبحان الله .. معلم بصحيح
العريس يفتح الباب فتحة صغيرة كده .. ينادي على أحمد بيه
العريس – الله ينور يا بو حميد .. مش هاوصيك بقى .. ومش مستعجلين .. خد راحتك خالص
احمد – ما تقلقش يا عريس .. أنا عينيا عشانك .. ده هي العروسة زي القمر من غير حاجة
العريس – ده من ذوقك والله يا احمد بيه .. ميرسي أوي
في الداخل .. الاسطى احمد يهزر مع العروسة .. معرفة قديمة بقى
الاسطى احمد – العريس بره هيولّع .. هههههه .. له حق .. الفستان عليكي هياكل حتة منك
العروسة ( بدلال ) – هئ هئ هئ .. ميرسي أوي يا احمد
الاسطى احمد - .. تحبي احرق لك دمه .. نتأخر عليه شوية .. هههههههه
العروسة – حرام عليك يا احمد .. هئ هئ هئ .. ده انت مشكلة والله
أبو جهل لإبليس – هوه فيه ايه يا بني ؟؟ .. الله يخرب بيتك .. دي العملية بايظة خالص
إبليس – إيه رأيك بقى .. لما نرجع تبقى تحكي لهم في دار الندوة على شغل اخوك
أبوجهل – أحكي لهم .. أحكي لهم ايه ياعم ؟؟ .. أكيد مش هيصدقوني
أحمد ينهي المهمة بنجاح تام .. والعريس يطلع مبلغ كده من جيبه ويديهوله بقشيش .. وسط عبارات الشكر والامتنانتنتهي مراسم تجميل العروسة .. يطلعوا على المصوراتي .. نكمل وللا بلاش احسن .. نكمل .
عشرات السيارات في الانتظار .. عرايس وعرسان داخلين طالعين . وصور مغطية محل التصوير من بره .. صور رجال ونساء في أوضاع مريبة خلت الفار يلعب في عب أبو جهل
أبوجهل – إبليس .. إيه اللي بيحصل هنا ؟؟ .. الناس دول بيخشوا جوه يعملوا إيه ؟؟.. وإيه الصور دي ؟
إبليس – دي من طقوس الزواج الضرورية دلوقت .. كل واحد يتصور مع عروسته قبل ما يروحوا الفرح .. وممكن يتصور مع بعض المعازيم كمان .. تحب تدخل جوه
أبو جهل – أدخل ؟؟ طبعا أدخل .. خلينا يا عم نتفرج
يدخلوا جوه .. في الاستوديو .. العريس يرحب بيهم
العريس – اتفضل يا إبليس بيه .. اتفضل . انت مش غريب
المصوراتي مشغول بضبط وضع العروسة مع العريس عشان الصورة .. ما سكها من كتفها .. ويحركها يمين وشمال .. يجيب وشها يمين .. يعدل راسها لفوق
المصوراتي – أيوه كده .. ميلي على كتفه كده .. كمان .. كمان .. أيوه عايزك على صدره كده .. ( يكلم العريس ) – بص بقى .. إيدك من هنا كده .. أيوه بالظبط كده . يابني مش كده .. إنت أول مرة تتجوز وللا إيه .. ههههههههه .. يضحك الجميع ..
المصوراتي يمسك العروسة - بص .. كده .. كده .. عايزك تمسكها كده بالضبط
العريس يتضايق من الحركة .. بس يبلعها عشان لازم يبقى جنتل قدام الناس .. يضحك وكإن مش هامّه حاجة
العريس – ههههههه .. آه والله فعلا أول مرة اتجوز .. هههههههههه
المصوراتي - بصى له بقى بصة حلوة كده .. ابتسمي .. الله .. أيوه .. حلوة أوي الابتسامة دي .. ياللا يا جماعة هنصور .. شييييييييييييييييز
أبو جهل (يشاور على المصوراتي ) – إبليس .. باقولك إيه .. هوه الجدع ده كوافير برضه؟
إبليس – لأ .. ليه ؟؟
أبو جهل – شايفه عمال يمسك العروسة كده يعني زي ما يكون ولامؤاخذة كوافير
إبليس – لا يا أخي .. عادي عادي .. هوه نظام الأفراح كده دلوقت
أبو جهل ( بنفاذ صبر ) – طيب .. ما تخلصنا من الشغلانة دي .. هوه فين الفرح ؟؟
إبليس – يخلصوا بس التصوير .. ونطلع على الفرح على طول
انتهى التصوير .. وانطلق الموكب الشديد في طريقه إلى الفرح .. الكل فرحان ويطلق كلاكسات العربيات في فرحة وبهجة
يوصلوا القاعة .. حاجة فخمة أوي .. والفرقة في الاستقبال ويمشي العريس والعروسة إلى داخل القاعة ومن وراهم المعازيم .. وفي داخل القاعة تبدأ مراسم الفرح بترديد أسماء الله الحسني
أبو جهل يشوف المنظر .. الكل بيردد أسماء الله الحسنى في خشوع .. الفرح فيه عدد كبير من الستات والبنات المحجبات .. يشعر بقلق .. يبص لإبليس .. إبليس بيبتسم في هدوءأبو جهل ( في انزعاج شديد ) – إيه ده يا إبليس .. أهو ده اللي كنت خايف منه وعامل حسابه . طلعني من هنا .. مش قادر اسمع الكلام ده
إبليس ( بثقة زائدة ) – ولايهمك .. استني دقيقتين بس
إبو جهل – يارجل أنا مش مستحمل المنظر .. الكل بيردد الكلام ده اللي انا مش باحب اسمعه . بص الناس متسمرين ازاي وهم بيسمعوا الكلام ده .. مش قادر . مش قادر
إبليس يمسك فيه شوية .. شوية والمقدمة تنتهي .. وينطلق الدي جي ليرفع عقيرته بصيحات الحرب في حماسة شديدة وعظمة أشد
الدي جي – والنهارده هنعيش أجمل الأوقات مع الأوركسترا العالمية .. بطاطا
أبو جهل – إيه ده يا إبليس .. طلع منين الواد ده .. وإيه اللي بيقوله ده
إبليس – ده الدي جي .. هو كبير القعدة دي .. يظبط الفرقة والناس .. بص كده
فجأة الأرض اهتزت تحت أقدام أبو جهل .. بفعل عدد رهيب من الآلات الموسيقية وعدد مخيف من الساوندات سببت له صمم مؤقت . وبص حواليه لقى الرجال المتسمرين .. والستات المتسمرات .. والمحجبات والمتبرجات كلهم قايمين يهنوا العريس والعروسة .. وسط ألحان صاخبة .. والـ دي جي واقف يطلق صيحات عالية ويشير للجميع بعظمة شديدة
أبو جهل – والـ دي جي ده ماله شايف نفسه كده ؟؟ .. ده آخره ولا مؤاخذة صبي عالمة
إبليس – هههههههه .. الله يكسفك .. يابني خليك مودرن بقى وبطل الكلام ده
فجأة تغيرت الموسيقى إلى نغمات حالمة .. وفوجئ أبو جهل بالعريس والعروسة بينزلوا ويرقصوا سويا قدام الناس .. ويتحركوا مع الموسيقى حركات استغرب لها جدا .. وسط تصفيق الجميع تتحرك أم العروسة وتغطي راس العريس مع راس العروسة بطرحة العروسة ..
أبو جهل – إبليس .. إبليس .. هم هيعملوا إيه ؟؟ .. منظرهم كده ما يطمنش
إبليس – ياراجل انت دايما تفكيرك وحش كده ؟؟ .. ده بيرقصوا مع بعض يا أخي بمنتهى الاحترام والأدب أهه
أبو جهل – آآآآه .. بيرقصوا .. ياراجل طمنتني .. أنا قلت مش معقول برضه
ينتهي العريس والعروسة من رقصتهم .. ويقعدوا في الكوشة .. يفاجأ أبو جهل ببنتين بيطلعوا على البست ويتحزموا ويرقصوا عشرة بلدي قدام العريس والعروسة .. في اجتهاد شديد في إظهار مفاتنهم .. مع إن واحدة منهم مغطية شعرها زي المحجبات
إبو جهل – إيه الغانيات دول ؟؟ الجواري ؟؟
أبليس – لا ياراجل .. جواري إيه بس .. دي أخت العروسة .. ودي واحدة صاحبتها .. بيرقصوا تحية للعرسان .. ولأسباب تانية برضه
أبو جهل – زي إيه كده ؟؟
إبليس – أهو كل واحدة منهم بتحاول تلفت نظر الشباب الموجودين .. يمكن تلاقي لها جوازة .. ده بقى نظام معتمد عند ناس كتير عشان يتجوزوا .. تعالى بقى نقعد في وسط الناس عشان عندي شوية شغل
يقعد إبليس مع شلة من الشباب أصحاب العريس .. يوسوس لهم شوية .. فتبدأ عينيهم تزوغ على البنات اللي بيرقصوا
واحد – بص ياله البنت دي .. أيووووووووه .. إيه اللي عاملاه في نفسها ده .. يخرب بيتها . دي رقصها عشرة على عشرة
التاني – لالأ .. بص صاحبتها دي .. دي أفرس منها .. جامدة أوي بصراحة .. ما تيجي نشوفوا نظامهم إيه دول .. ههههههههه
التالت – استنوا استنوا اصورهم بالموبيل ..
يطلع الموبيل .. كليك .. كليك .. كام صورة حلوين .. الله ينور .. يتحركوا في اتجاه البنات يصقفوا لهم جامد .. البنات يتحمسوا أكتر مع التصفيق .. إبليس يفرح جدا .. وينتقل لمجموعة تانية وتالتة .. ويمارس هوايته في الغواية والإفساد ..
أبو جهل مبسوط جدا من اللي بيشوفه .. وإبليس شاعر بالفخر قدامه
أبو جهل – والله جميلة أوي أفراح المسلمين دي .. أهو كده الواحد يشم نفسه شوية
إبليس – أنا قلت افرفشك شوية .. تعال نروح بقى .. أنا كده خلصت شغلي
يخرج إبليس وصديقه اللدود أبو جهل .. بيضحكوا بشدة على اللي عمله إبليس في المسلمين .. إبليس نافش ريشه قدام أبو جهل .. وأبو جهل فرحان أوي بسلوكيات المسلمين المنحرفة
يركبوا العربية متوجهين للفندق .. الشوارع فاضية .. الساعة تلاثة الفجر .. وإبليس بيجري بالعربية .. فجأة يظهر قدامه واحد بيعدي الشارع .. إبليس يضغط على الفرامل بأقصى قوة .. يحاول يفاديه .. يمين .. شمال .. اصطدم بيه بشدة .. والعربية انحرفت منه وخبطت في عامود نور
صمت رهيب يخيم على المكان .. أبو جهل مذهول من الموقف .. إبليس يحاول يخرج من العربية .. يطلع بصعوبة شديدة .. اتخبط في دراعه خبطة جامدة .. لكن بيتحرك برضه .. أبو جهل ما حصلوش حاجة .. ينزل من العربية .. يتوجهوا ناحية المصاب .. بعض السيارات وقفت على جنب .. واتنين تلاتة اتجمعوا .. واحد ينزل من العربية ويتجه ناحية المصاب
الراجل – إصابته شديدة يا جماعة .. لازم يروح المستشفى حالا
إبليس – أنا حاولت أفاديه أد ما اقدر .. بس مافيش فايدة
الواحد – مش وقته الكلام ده .. لو عربيتكم مش هينفع تتحرك آخدكم معايا .. لازم نروح المستشفى حالا
أبو جهل – طيب .. نروح
ضابط مرور يوصل بالموتوسيكل .. يفهم الموضوع .. ينطلقوا كلهم للمستشفى
في الطريق .. الراجل يعرفهم بنفسه .. الدكتور محمود .. طبيب في أحد المستشفيات الخاصة .. يتصل من الطريق بالمستشفى .. عشان يجهزوا غرفة العمليات
في المستشفى .. المصاب نزف دم كتير .. ولازم نقل دم فورا .. وهيعمل عملية سريعة .. أخدوا عينة دمه .. فصيلة دمه مش موجودة في المستشفى
الدكتور محمود – حد من قرايبك ممكن يتبرع لك بالدم ؟
المصاب – أنا راجل غلبان يا دكتور .. وماليش حد .. وما عنديش تليفون اتصل بحد .. ارجوك انقذني يا دكتور
الدكتور محمود عينة دمه من نفس الفصيلة .. ياخد قرار سريع بالتبرع بدمه لإنقاذ حياة المصاب
أبو جهل – انت يا دكتور تعرف الراجل ده ؟
الدكتور – لا .. أنا أول مرة أشوفه
أبو جهل – وازاي تساعد واحد ما تعرفوش ؟؟
الدكتور – مش إنسان يا خي ؟؟ .. بني آدم زيي .. غريبة ان انا اساعده ؟؟
أبو جهل - أصلي شايفك بتساعده بإخلاص أوي .. وكمان هتتبرع له بدمك
الدكتور – يا حاج أنا راجل مسلم واعرف ربنا .. لو ما كنتش أنا أساعده بإخلاص في ظرف زي ده .. أمال مين اللي يساعده .. ربنا بيقول ( إنما المؤمنون إخوة )أبو جهل يشعر بحسرة شديدة .. وفي لحظات يتبرع الدكتور بدمه لإنقاذ المصاب .. ويدخله غرفة العمليات .. الجميع في انتظار انتهاء العملية
أبو جهل – هو انت متعود تعمل كده دايما ؟؟
الدكتور – ربنا يقدرنا دايما على فعل الخير .. الحقيقة أنا أول مرة اعمل كده .. بس شعور جميل جدا انك تنقذ حياة انسان .. فعل الخير جميل جدا
الدكتور يطلع مصحفه ويقرأ القرآن بصوت جميل .. ويدعو بحرارة للمصاب
أبو جهل يكاد يبكي من الحسرة .. إبليس يشعر بآلام شديدة من قراءة القرآن .. يتجه إلى دورة المياه فرارا من الموقف .. أبو جهل يشعر بالعيون تحيط بيه .. وهو وحيد ومنبوذ .. يسمع الدكتور محمود وهو يرتل القرآن .. صوته يرتفع شيئا فشيئا .. يملأ الغرفة بصوت جميل .........
هناك تكمله للقصه لكن انا مش هكتبها كلها ولكن هجيب الحلقه الاخيره وخلاص
:)
__________________